漢羅版（在來字+白話字）
這篇文章算是「不沉空母之彰化飛行場」這个主題个第 3 篇，伊本底是我寫乎我讀幼稚園大班个後生參加彰化縣 2023 年『「童言童語說童話」幼兒說故事比賽』个故事稿。我八𤆬阮子去看 hit 2 枝古炮台幾落改，問伊炮台朗總有歸枝，伊應講有 3 枝，我感覺伊按呢講嗎無不着，閣真心適，着決定用 3 枝炮台做主題。不閣治咧寫這故事个過程中，我發現 kan-na 寫炮台無省乜故事性，故事講起來會箱無聊，所以尾仔我閣共台灣人米空襲甲媽祖承炸彈个故事加入來，甲頭前 2 篇「不沉空母之彰化飛行場」个內容合做伙，變做這个故事。
故事个內容對後一段正式開始：
逐家好，今仔日我卜來共逐家講咱彰化有 3 枝趣味个炮台个故事。第 1 枝治咧福興鄉个番婆社區，彰鹿路頂有一个巷仔口，有裁一枝牌仔寫「日本時代古炮台」，土脚有畫 4 隻彩色个小台飛行機，順飛行機 个方向走入去巷仔，走到底閣倒挖行一段路，着會凍看着田邊有一枝生做高高、歸枝氆氆、紅毛塗空个、看起來親像足大座 个鐘仔，這是我卜共逐家講个第 1 枝炮台，伊應該講是炮塔，塔頂即是砲台，炮塔个外口嗎有大大小小个銃空，人會凍米治內底向外口射大炮亞是銃子。
對這駛車差不多 10 分鐘去到外埔社區，會凍看着第 2 枝炮台，伊去乎田甲厝圍起來，愛小可仔尋一下即會凍看着，伊看起來着親像第 1 枝个雙生仔，只是恰矮一戌仔。
這 2 枝炮台，是日本時代尾期起个，因本來是飛行機場个一部份。這飛行機場不是一般个飛行機場，伊是起來專門卜訓練戰鬥機駕駛个，日本人共號做「彰化飛行場」。
喜冬存太平洋戰爭當咧戰甲袂收煞，包含米國在內个真多國家朗有派戰鬥機來炸台灣，台灣人三不五時着愛米空襲，台灣全島有真多媽祖飛去天頂承炸彈个故事。
彰化南瑤宮个媽祖，閣八顯聖治咧基隆，替基隆人承炸彈，一直到今仔日，基隆慶安宮爲着卜答謝媽祖，逐年朗會恭請南瑤宮媽祖去基隆作客。
埤頭合興宮个炸彈媽嗎是真出名，合興宮附近恰早有糖廠、五分仔車車頭、嗎有起乎戰鬥機用个飛行機場。合興宮个媽祖婆不那有飛去天頂承炸彈个故事，hia 个人閣有治田--lih 拾着無爆炸个炸彈，處理好勢、確定伊袂閣爆炸了後，共炸彈个殻拾返去廟--lih，當做是媽祖婆靈聖 ê 證據。
故事講到 chia，逐家一定想講，第 3 枝炮台治叨位咧？咱閣返來去一開始个番婆社區，hia 个人為着卜乎人知影 hia 進前是 1 个飛行機場，因有創 1 个飛行機公園，內底有 khǹg 1 枝仿个、小小枝仔、古錐古錐、外口有圖个炮台，這着是第 3 枝炮台，伊个邊仔閣有 khǹg 1 台救難用个直升機，逐家有閒會凍去看覓咧喔！
好，我个故事着講到這，逐家再會！
全羅版（白話字）
Chit phiⁿ bûn-chiuⁿ sǹg-sī "Put-tîm-khòng-bù chi Chiong-hòa hui-hêng-tiûⁿ" ê tē 3 phiⁿ, i pún-té sī góa siá hō͘ góa tha̍k iù-tī-hn̂g tōa pan ê hāu-siⁿ chham-ka Chiong-hòa-koān 2023 nî "Tông-giân-Tông-gí-kóng-tông-ōe iù-jî kóng kò͘-sū pí-sài" ê kò͘-sū kó. Góa pat chhōa gún kiáⁿ khì khòaⁿ hit 2 ki kó͘-chá phàu-tâi kúi-lō kái, m̄-koh mn̄g i phàu-tâi lóng-chóng ū kui ki, i ìn kóng ū 3 ki, góa kám-kak i án-ni kóng mā bô m̄-tio̍h, koh chin sim-sek, tio̍h koat-tēng iōng 3 ki phàu-tâi chò chú-tê. M̄-koh tī-leh siá che kò͘-sū ê kòe-têng tiong, góa hoat-hiān kan-na siá phàu-tâi bô siáⁿ-mih kò͘-sū-sèng, kò͘-sū kóng khí-lâi ē siuⁿ bô-liâu. Só͘-í bóe--á góa koh kā Tâi-oân lâng bih khong-si̍p kah Má-chó͘ sîn chà-tôaⁿ ê kò͘-sū ka li̍p-lâi, kah thâu-chêng 2 phiⁿ "Put-tîm-khòng-bù chi Chiong-hòa hui-hêng-tiûⁿ" ê lōe-iông kap chò-hóe, piàn-chò chi̍t ê kò͘-sū.
(Kò͘-sū ê lōe-iông ùi āu 1 toān chèng-sekkhai-sí.)
Ta̍k-ke hó, kin-á-ji̍t góa beh lâi kā ta̍k-ke kóng lán Chiong-hòa ū 3 ki chhù-bī ê phàu-tâi ê kò͘-sū. Tē 1 ki tī leh Hok-heng-hiong ê Hoan-pô siā-khu, Chiong-lo̍k-lō͘ téng ū 1 ê hāng-á-kháu, ū chhāi 1 ki pâi-á siá "Ji̍t-pún sî-tāi kó͘ phàu-tâi", thô͘-kha ū ōe 4 chiah chhái-sek ê sòe tâi hui-lêng-ki, sūn hui-lêng-ki ê hong-hiòng kiâⁿ li̍p-khì hāng-á, kiâⁿ kàu té koh tó oat kiâⁿ chit tōaⁿ lō͘, tio̍h ē-tàng khòaⁿ tio̍h chhân piⁿ ū 1 ki siⁿ chò koân koân, kui ki phú-phú, âng-mn̂g-thô͘ khong–ê, khòaⁿ khí-lâi chhin-chhiūⁿ chiok tōa chō ê cheng-á, che sī góa beh kā ta̍k-ke kóng–ê tē 1 ki phàu-tâi, i èng-kai kóng sī phàu-thah, thah téng chiah sī phàu-tâi, phàu-thah ê gōa-kháu mā ū tōa-tōa-sòe-sòe ê chhèng-khang, lâng ē-tàng bih tī lāi-tóe hiòng gōa-kháu siā tōa-phàu á-sī chhèng-chí.
Ùi chia sái-chhia chha-put-to 10 hun-cheng khì kàu Gōa-po͘ siā-khu, ē-tàng khòaⁿ tio̍h tē 2 ki phàu-tâi, i khì hō͘ chhân kah chhù ûi khí-lâi, ài sió-khóa-á chhōe chi̍t-ē chiah ē-tàng khòaⁿ tio̍h, i khòaⁿ khí-lâi tio̍h chhin-chhiūⁿ tē 1 ki ê siang-siⁿ-á, chí-sī khah óe chi̍t-sut-á.
Chit 2 ki phàu-tâi, sī Ji̍t-pún sî-tāi bóe-kî khí–ê, in pún-lâi sī hui-hêng-ki-tiûⁿ ê chi̍t-pō͘-hūn. Che hui-lêng-ki-tiûⁿ m̄ sī it-poaⁿ ê hui-lêng-ki-tiûⁿ, i sī khí lâi choan-bûn beh hùn-liān chiàn-tàu-ki kà-sú ê, Ji̍t-pún lâng kā hō͘ chò "Chiong-hòa hui-lêng tiûⁿ".
Hit-tang-chūn Thài-pêng-iûⁿ chiàn-cheng tng-leh chiàn kah bōe siu-soah, pau-hâm Bí-kok chāi-lāi ê chin chōe kok-ke lóng ū phài chiàn-tàu-ki lâi chà Tâi-oân, Tâi-oân-lâng sam-put-gō͘-sî tio̍h ài bih khong-si̍p, Tâi-oân choân tó ū chin chōe Má-chó͘ poe khì thiⁿ-téng sîn chà-tôaⁿ ê kò͘-sū.
Chiong-hòa Lâm-iâu-kiong ê Má-chó͘ , koh pat hián-sèng tī leh Koe-lâng, thòe Koe-lâng lâng sîn chà-tôaⁿ. It-ti̍t kàu kin-á-ji̍t, Koe-lâng Khèng-an-kiong ūi-tio̍h beh tap-siā Má-chó͘, ta̍k-nî lóng ē kiong chhiáⁿ Lâm-iâu-kiong ê Má-chó͘ khì Koe-lâng chò-kheh.
Pi-thâu Ha̍p-heng-kiong ê Chà-tôaⁿ-má mā sī chin chhut-miâ, Ha̍p-heng-kiong hù-kūn khah-chá ū thn̂g-chhiúⁿ, gō͘-hun-á-chhia chhia-thâu, mā ū khí lâi beh hō͘ chiàn-tàu-ki iōng ê hui-lêng-ki-tiûⁿ. Ha̍p-heng-kiong ê Má-chó͘-pô m̄-nā ū poe khì thiⁿ-téng sîn chà-tôaⁿ ê kò͘-sū, hia ê lâng koh ū tī chhân–lih khioh tio̍h bô po̍k-chà ê chà-tôaⁿ, chhú-lí hó-sè, khak-tēng i bōe koh po̍k-chà liáu-āu, kā chà-tôaⁿ ê khak khioh tńg--khì biō–lih, tòng-chò sī Má-chó͘-pô lêng-siàⁿ ê chèng-kù.
Kò͘-sū kóng kàu chia, ta̍k-ke it-tēng siūⁿ-kóng, tē 3 ki phàu-tâi tī tó-ūi leh? Lán koh lâi tńg--khì chit-khai-sí ê Hoan-pô siā-khu, hia ê lâng ūi-tio̍h beh hō͘ lâng chai-iáⁿ hia chìn-chêng sī 1 ê hui-lêng-ki-tiûⁿ, in ū chhòng 1 ê hui-lêng-ki kong-hn̂g, lāi-té ū khǹg 1 ki hóng–ê, sóe-sóe ki á, kó͘-chui kó͘-chui, gōa-kháu ū ōe-tô͘ ê phàu-tâi, che tio̍h sī tē 3 ki phàu-tâi, i ê piⁿ--á koh ū khǹg 1 tâi í-keng pò-hùi ê kiù-lān iōng ti̍t-seng-ki, ta̍k-ke ū-êng ē-tàng khì khòaⁿ-māi leh o͘ !
Hó, góa ê kò͘-sū tio̍h kóng kàu chia, ta̍k-ke chài-hōe!