彰化 chit-má 有 2 ê 紀念 1947 大屠殺 ê 紀念碑，其中 1 ê 治彰化縣立圖書館頭前，由彰化縣政府所設立，治 2022 年完工，是 1947 年到今為止上慢設立 ê 紀念碑。另外 1 ê 治鹿港海埔厝，離鹿港市區有一段仔 ê 施家墓園內底，是私人起造 ê 紀念碑，雖然講是私人 ê，不閣一般民眾會凍入去參觀。這 ê 紀念碑 ê 名號做「施江南醫學博士罹難紀念碑」，由受難者施江南先生 ê 孫仔（in 小弟施江北 ê 後生），施優生建築師所設計，治 2007 年着已經完工。

施江南先生是鹿港人，出世治咧日本時代（1902-1947），in 阿祖是清國 ê 秀才，伊本身是去日本學習醫學 ê 台灣人當中，第 10 ê 提着醫學博士--ê。施江南先生 in 兜有 4 ê 兄弟仔，伊排第三，阿兄是江東、江西，小弟是江北。除了江北以外朗是醫生，in 兄弟仔治嘉義中山路、台北羅斯福路、台北天水路 kah 鹿港中山路朗有開病院，朗號做「四方病院 」。鹿港這間四方病院，開治咧鹿港大街底 ê 城隍廟附近，不閣已經拆掉，原址 chit-má 是成安藥房（中山路 380 號）。

戰後，有真多台籍日本兵無法度返來台灣，亞是講返來台灣了後無頭路通食、生活有困難。施江南先生為着這卦台籍日本兵出錢出力，參伊 ê 兄弟仔 kah 朋友創立「鹿港街海外同胞救濟會」，四界 cháu-chông，chhōe ROC 政權 ê 官員討論按盞處理這卦台籍日本兵抵着 ê 問題，比如講 chhōe 陳儀討論調船仔共台籍日本兵載返來、chhōe 柯遠芬討論台籍日本兵返來台灣了後生活困苦 ê 問題，ROC 政權無咧要意這卦台籍日本兵，致使施江南先生定定會 kah in 寃家。

1947 年，大屠殺發生 hit 當時，施江南先生治 3 月初乎人推選做「228 事件處理委員會」ê 委員，不閣伊 hit-tang-chūn 着 Ma-la-lí-á(瘧疾)，定定倒治厝內宿困，無 siáⁿ 有法度出門去開會，照講袂因為按呢出代志。不閣治 3 月 12 ê 暗時八點左右，一陣 giâ 銃 ê ROC 政權兵仔來到台北天水路 ê 四方病院敲門，假講 beh 乎先生看病，lòng 破兩扇門了後，衝入內共伊抓去，從此無消無息，到今連死體 to 不知治叨位，目前葬治施江南先生 ê 墓內底--ê，是伊 ê 衫仔褲。伊 ê 牽手，陳焦桐女士，治 2013 年 100 歲過身，嗎葬治鹿港 ê 施家墓園，kah 伊 ê 尫婿 ê 衫仔褲做伙。

施江南先生捌共陳焦桐女士講過：「你 siūⁿ 驚死，台灣人那朗像你按呢 hiah-nī 驚死 beh 按盞？」陳焦桐女士嗎有講過，代志發生 2, 3 冬了後，伊有夢着施江南先生返來過，歸身軀 tâm-lok-lok 行入內客廳，一句話 to 無講，tiām-tiām-á 坐--leh。對口述歷史 ê 文字內容來看，咱會凍斷定陳女士講 ê 是台語，不閣出版 ê 文字是中文，乎我感覺實在真可惜閣悲哀。親人乎 ROC 政權刣死，歸落年了後，心內話煞無法度用母語 ê 文字乎人紀錄落來。

時間來到 2024 年 4 月底，哈佛大學有學生治中國大使謝峰去 in 學校演講 ê 時陣抗議 PRC 政權迫害圖博人、香港人、Uyghur 人 kah 台灣人 ê 人權，in 抗議 ê 布條仔寫講「CHINA LIES, PEOPLE DIE」。其中一位參與抗議 ê 學生，吳亭樺（Cosette Wu），是施江南先生 ê 干仔孫，in 阿媽是施江南先生 ê 第 3 ê 查某子，伊治夏威夷出世 kah 大漢。民視 ê 新聞標題按呢寫：「狠嗆中國駐美大使！ 哈佛學生吳亭樺是228受難者遺族」，真多媒體講伊繼承 228 ê 抗暴精神，使人欽佩。這位吳女士確實無簡單，伊治高中時代為着 beh 了解 ka-kī 家族治 228 發生 ê 代志，透過訪問示大，閣有參考陳焦桐女士 ê 口述歷史，出版一本用英文書寫 ê 施江南傳：《The Story of Shih Jiangnan 施江南傳》，《台陽文化協會電子報》第 29 期有共部份翻譯做中文。

咱朗知影，1947 大屠殺 ê 元兇、刣死施江南醫學博士 ê 兇手着是 ROC 政權，這 ê 中國政權不那治台澎刣人放火，又閣 am-khàm 事實，「CHINA LIES, PEOPLE DIE」 這句提來講 ROC 政權嗎是完全正確，兩 ê 中國政權朗欺騙閣屠殺人民。

不閣咱嗎愛知影，雖然講對抗 PRC 已經是普世 ê 價值，那是 beh 趕 ROC 離開台澎，亞是着靠咱覺醒 ê 台澎人！